CHRONIQUE WALLONNE

Par Marie Binauche

R'vazî èt spot

C'èst dins lès vîyès mârmites qu'on faît l' mèyeû dès sopes.

Tûzadje

On wèt co, au djoû d'audjoûrdu, dès maujones d'i-gn-a quate cints-ans qui sont todi su pîd. On djoûwe co, au djoû d'audjoûrdu, dès pîces di tèyâte da Molière. On djoûwe co, au djoû d'audjoûrdu li musique da Mozart, Beethoven Schubert ou d's-ôtes. Est ç' qui, dins trwès ou quate cints-ans, on tchanterè co dès tchansons d'asteûre? Est ç' qu'on djoûwerè co dès pîces di scrîjeûs d'asteûre? Est ç' qui lès maujones qu'on vint d' bâti ègzistéyeront co? Douvint? Dji tûze!

S'apinse one saquî:

Li cia qui n' bwèt jamaîs qu' do fayé cafeu trove qui l' bon a on drole di gout (d'après Pierre Faulx).

Po rîre one bouchîye

Li p'tit Totor a r'çû s' buletin, come tos lès-èlèves di s' classe. Et, I n'èst nin fwârt bia, si buletin, nin bia du tout.

Tot-z-è ralant à s' maujone, i s' dimande comint anoncî ç' mwaîje novèls-là à s' papa. Nin lès pwin.nes di balziner, i lî faut dîre platèzag:

Papa, di-st-i, dj'a r'çû m' buletin, I n'èst nin fwârt bia, savoz, mins come vos d'djoz todi: çu qui compte, c'èst l' santé!

Lès djeus da matante Cédonîye

gn-a saquants mots walons qui vègnenut do mot «quèwe». Si on vos dit ç' qu'i vol'nut dîre, lès saurîz r'trover? V'loz sayî?

frapper de la queue, petite quantité, file, poignée d'outil, poêlon à manche, hésiter, action de frapper de la queue, écoué

Rèsponses: frapper de la queue = quèwyî;

petite quantité = quèwète

file = quèwéye;

poignée d'outil = quèwion;

poêlon à manche = quèwèt;

hésiter = quèweter;

action de frapper avec la queue = quèwiadje;

écoué = squèwé.