chîjes èt pasquéyes

R’vazî èt spot

S i-gn-âreut qu’on gout, gn-âreut qu’one sauce.

Dji tûze

C’è-st-on' ètranjêr qui vint d’ôte paut.

Ça faît qu’on n' va plus p’lu causer d’ètranjêr, insi? On n' p’leut d’dja pus dîre «aveûle» ou «soûrdèche» èt nin co «feume à djoûrnéye»! È vous' co? Come si cès mots là, ci sèreut dès laîds mots! Ci n’èst nin lès mots qu' sont laîds, c’èst l' maniére qu’on-z-è cause, c’èst ç' qu’on pinse. Et si c’èst po n' nin mète li dwègt su nos difèrinces, i n' faurè pus causer d’omes èt d' coméres, di vîs èt d' djon. nes, di maîsse èt d' vaurlèts. èt d' sots èt d' sûtîs!

Pinséye da

On n' vint nin à coron d’on vaurin si aujîmint qu’on l' pinse (A. Laloux).

Po rîre one bouchîye

– Docteûr, i-gn-a one saqwè qui n' va nin! di-st-i l’ome en-z-intrant èmon l' médecin po lès niêrs.

– A! Vûdoz vosse coûr, ça vos soladjerè èt vos fé do bin.

– Bin, vola! Dji vike bin: dj’a one auto, dji magne dins lès grands-ôtéls èt m’abiyî avou ç' qu’i-gn-a d' pus tchêr. Mi feume èst todi al dêrène môde èt lèye èto, todi en route èt bin viker.

– Bin, Mossieû, dji n' veu nin ç' qui gn-a à vos tracasser là d’dins!

– Siya, docteûr. Dji m' dimande comint ç' qui c’èst possibe: Dji n' gangne qui mile chîs cints-eûros pâr mwès… èt c’èst ça, vèyoz, qui m' tracasse, vèyoz…

Lès djeus da matante Cédonîye

Dins l' binde di cès mots ci, gn-a onk qui n va nin avou l’s-ôtes. L’avoz r’trové?

Blankicheû, bolîye, bougnèt, dauborer, pinte, tapisserie.

Rèsponse:

Li mot qui n' va nin avou l’s-ôtes, c’èst «bougnèt»=(boulet de charbon). Tos l’s-ôtes, c’èst dès mots qu’ont à veûy avou l' pinte:

– pinte=peintre;

– blankicheû=chauleur;

– bolîye=colle;

– tapisserîye=papier à tapisser;

– dauborer=barbouiller.