CHRONIQUE WALLONNE CHÎJES ET PASQUEYES

R’vazî èt spot

Gn-a d' si bia solé qui n' divègne savate.

Tûzadje: Quand tot va bin, on pinse qui ça va todi durer.. Qu’on-z-aurè todi one boune santé, dèl fwace assez, qu’o-z-aurè todi dès caurs one miète qui vaye. Mins, di-st-i li spot, gn-a d' si bia solé qui n' divègne savate, ça vout dîre qu’i-gn-a rin qui dure. Dins on sins' come dins l’ôte. Gn-a pont d' solé qui n' divègne savate èt gn-a pont d' si longue nût qui l' djoû ni r’vègne. Il faureut d' tènawète î tûzer!

S’apinse one saquî: One feume kimince pa dîre one idéye à s’-t-ome, èt s’il a l' minme idéye qui lèye, èle faît come i vout (Pierre Faulx).

Po rîre one bouchîye: Li Victôr, gn-a nin à dîre, i s' pwate bin! A yût' ans, I pèse dèdja sèptante kulos. Si mame va trover l' médecin pace qui, ci n’èst nin normâl, don?

– èst ç' qu’i mougne sovint ètur lès-eûres, dimande-t-i l’ome di syince?

– po dîre li vraî, docteûr, i n' djoke jamaîs!

Èt pace qu’i vaut mia rîre qui braîre:

Vos-èstoz bin sondjaude audjoûrdu, di-st-i l' Pôl à s' pitite mayon.

– bin oyi, c’èst pace qui dj’a tûzé qui nos n' nos p’lans nin mârier.

– comint ça?

– pace qui dins nosse famile, ç’a todi stî insi, on tchwèsi todi one saquî d' nosse famile. Mi pa a mârié m' mame, mi grand-pére a mârié m' grand-mére, mi mounonka a mârié m' matante èt vos 'nn’auroz.

Lès djeus da matante Cédonîye

Dins l' binde du cès mots ci, gn-a onk qui n' va nin avou l’s-ôtes. L’avoz r’trové?

Stwèle à quèwe, stwèle do bièrdjî, tchaur Pôcèt, paîlon, jate

Rèsponses: Li mot qui n' va nin avou l’s-ôtes, c’èst jate (tasse) Tos lès-ôtes, c’èst dès stwèles: stwèle à quèwe = comète; stwèle do bièrdjî = étoile du berger = Vénus; tchaur Pôcèt = Grande Ourse; paîlon = Grande Ourse.

Des bones pauques a tortos!